SINSALaudio.org

Eagle Twin

berio — 2010-01-28T12:36:43Z

SUNN O)))
+ Eagle Twin

Museo MARCO de Vigo. Luns 1 de febreiro.
Portas abertas 20:15 h, inicio 20:30. 15 euros
Entradas en www.servinova.com

Eagle Twin, unha nova banda do catálogo de Southern Lord Records formada polo batería Tyler Smith e polo guitarrista Gentry Densley. Presentan en xira por Europa con Sunn O))) o que é o seu primeiro disco, The Unkidness of Crows, sete cancións que traspasan o drone doom achegándose ao jazz dende o profundo son da voz e os xogos entre a guitarra e a batería. Músicos de longo percorrido, Tyler Smith vén de Form of Rocket e Densley xa formou parte no pasado dos seminais Iceburn. Eagle Twin mesturan a forza do seu son con ritmos hipnóticos e composicións progresivas conseguindo ambientes imposibles, unha creación máis no límite do audible.

Sunnn o)))

berio — 2010-01-28T12:25:44Z

SUNN O)))
+ Eagle Twin

Museo MARCO de Vigo. Luns 1 de febreiro.
Portas abertas 20:15 h, inicio 20:30. 15 euros
Entradas en www.servinova.com

Sunn O))) son unha das bandas máis radicais de entre a nova fornada do black metal, e sorprendentemente tamén das que contan con maior número de seguidores, as súas xiras son auténticos acontecementos que non permiten a indiferencia, así o atestemuñan entre a crítica o seu paso nos últimos anos polo Sónar ou o Primavera Sound. A actual xira europea só ten catro paradas na península; Vigo, Lisboa, Madrid e Barcelona.

A banda formada por Stephen O´Malley e Greg Anderson ten aínda quente entre os mellores do 2009 o seu último disco, Monoliths & Dimensions, un novo paso na súa carreira que supón a súa obra máis ambiciosa, percorrendo o camiño entre o minimalismo e o abstracto, máis acompañados que nunca e sen renunciar a levantar rañaceos de drones. Monoliths & Dimensions é iso, unha obra arquitectónica fóra das tres dimensións, ou máis alá.

Sunn O))) toman o seu nome dunha xa desaparecida marca de amplificadores, Sunn Musical Equipment Company, os seus preferidos e dos que o seu son é dalgún xeito debedor, tamén fai referencia ao seu admirado grupo Earth e á rotación da Terra ao redor do Sol. Levan sete álbumes de estudio, a maioría no seu propio selo, Southern Lord Records, berce de moitas outras propostas dentro do black metal.

Definir a Sunn O))) sen falar de apocalipse non é doado, en calqueira caso dicir que traballan unha posta en escena de ambiente sepulcral, afundidos baixo as súas capuchas negras enchen as salas de fume para levar a vibración das súas guitarras ao fondo do peito do público, fai de nós caixas de resonancia para o seu ritual. O Salón Sinsal convertirase por unha noite nun escuro recipiente onde a banda drone doom construirá os seus muros infranqueables de puro son.

_

berio — 2009-10-23T10:42:10Z

- Extensión A Coruña-Seoane

The Dodos

berio — 2009-10-21T15:42:29Z

THE DODOS
+ Artista Invitado.
Museo MARCO de Vigo.
Xoves, 17 de decembro.
20:30 h.
12 euros

The Dodos son unha banda californiana que con tres álbumes publicados é unha das propostas de Weird Folk máis interesantes. Comparten afinidades con Xiu Xiu, Iron and Wine, Animal Collective ou Six Organs of Admittance, se ben con características propias. The Dodos chaman ao seu estilo Psych Folk, e non é de estranar, baixo composicións de corte clásica agóchase unha sección rítmica a cargo de Logan Kroeber, toda unha eminencia en canto a percusión africana se refire. A outra metade de The Dodos é Meric Long, a voz e a guitarra, que así susurra como acompaña á batería nun fluír que por momentos parece sacado da banda sonora dos corredores dun psiquiátrico, como parece aseverar a canción Two Medicines. Time to die é o seu último traballo, á venda dende agosto e a confirmación da radical orixinalidade do dúo, devenido para a ocasión en trío, tras a incorporación ao vibráfono de Keaton Snyder. The Dodos encherán a sala do MARCO de ritmos psicodélicos para despedir a programación de Outono do Festival SINSAL.

The Dodos- Fables

http://www.myspace.com/thedodos
http://www.dodosmusic.net

Circle

berio — 2009-10-21T15:42:27Z

CIRCLE
Museo MARCO de Vigo.
Luns, 30 de novembro.
20:30 h.
8 euros

Case vinte anos levan Circle facturando discos dende Finlandia, lonxe quedan xa os primeiros noventa e os discos creados nunha lingua inventada chamada Meronian, como anos máis tarde farían Sigur Ros. Xa en inglés Circle chegan ao novo século como unha banda capaz de mesturar riffs propios do heavy metal cunha actitude e unhas propostas máis propias do krautrock ou do post-rock, o que lles valeu a etiqueta de heavy alternativo. O certo é que nunha primeira escoita da banda finesa o único que queda claro é que fuxen de todo encasillamento. Son, sen máis, unha banda de rock moi particular.

http://www.myspace.com/circlefinland
http://www.circlefinland.com/

Emilio José

berio — 2009-10-21T15:42:24Z

EMILIO JOSÉ
+ Tender Forever

Museo MARCO de Vigo.
Xoves 19 de novembro.
20:30 h.
10 euros

Despois de sorprender á prensa especializada dende Apeiron e o seu Todo sigue intacto, Emilio José lánzase en solitario co disco más estremeiro, heterodoxo e radical do ano en estado español. Chorando apréndese é unha sucesión dislocada de temas encabalgados que van dende a Bossa ao Hip Hop entre samplers que dan conta da realidade galega recente, sen escatimar críticas ácidas á clase política. Emilio José vén dende as pozas de Melón a trastocar o panorama musical do país. “Sangrando de felicidade” agardamos por el.

http://www.myspace.com/singstaralone

Tender Forever

berio — 2009-10-21T15:42:22Z

TENDER FOREVER
+ Emilio José

Museo MARCO de Vigo.
Xoves 19 de novembro.
20:30 h.
10 euros

Baixo o nome Tender Forever agóchase Melanie Valera, unha rapaza francesa afincada en Portland que reivindica a sinxeleza tras a sorpresa dos seus dous primeiros discos. 400 concertos máis tarde, a súa sensibilidade low-fi enriquécese con actuacións cheas de histrionismo. Cun ukelele, un portátil ou a Wii, Tender Forever enche o escenario transcendendo os discos, demostrando que o pop tamén pode ser unha experiencia límite. “Nacín o ano do punk”, adoita dicir, e nótase.

http://www.myspace.com/tenderforever

Bedroom community

berio — 2009-10-21T15:42:19Z

BEDROOM COMMUNITY
Nico Muhly, Ben Frost, Valgeir Sigurdsson, Sam Amidon
Museo MARCO de Vigo
Mércores, 4 de novembro.
20:30 h.
10 euros

Bedroom Community pódese traducir como cidade dormitorio, ese é o territorio polo que se moven os músicos do selo islandés, os arrabaldes da música contemporánea, do pop ao ambient, da clásica á experimentación. A unión e a colaboración de catro músicos, dous estadounidenses, un islandés e un australiano dá como consecuencia unha polifonía de voces unidas por algo máis que a filiación comercial. Medios especializados de todo o mundo dan conta das propostas dos seus membros, abrindo camiños para a música. “En tan só un ano, o selo islandés Bedroom Community destilou algúns dos álbumes máis interesantes dos últimos tempos”, e para esta cita na estación Outono do Festival Sinsal presentarán o set completo, catro concertos a cargo de Nico Muhly, Ben Frost, Valgeir Sigurdsson e Sam Amidon.

O estadounidense Nico Muhly é compositor, produtor e intérprete, o seu segundo e último traballo en solitario, Mothertongue, afonda na experimentación luminosa que xa caracterizara o seu anterior traballo, ocupando un espazo virxe entre a música de cámara e a música contemporánea. Nico Muhly é un paisaxista cuxo pincel é a música, destaca como compositor de bandas sonoras e colaborador de xente tan dispar como Björk, Bonnie “Prince” Billy ou Antony and the Johnsons.

Ben Frost, australiano, ocupa no selo o lugar do escuro, compositor de atmósferas abafantes e melodías desacougantes, remite por momentos ao Cyberpunk, o Dark Metal ou o Minimalismo Clásico. As súas composicións transitan entre o ambient e o ruído ao que inevitablemente conducen, estoupando entre as mans dun músico visceral. Ten colaborado con Björk, Amiina, Fennesz ou Tim Hecker.

Ben Frost no Sónar 2009 from alg-a on Vimeo.

O produtor e compositor Valgeir Sigurdsson sírvese da súa experiencia para facturar un álbum, Ekvilibrium, cheo de referencias e camiños. Colaborador habitual de Björk, CocoRosie, Camille ou Bonnie “Prince” Billy, que pon as voces de Ekvilibrium, Valgeir Sigurdsson aterrou na música como arranxista, enxeñeiro ou facendo as programacións, de aí o seu virtuosismo na mestura de sons, xogando coa electrónica ou cos instrumentos de corda para crear un estilo que bebe do post-clásico. No ano 2006 crea o selo Bedroom Community.

Sam Amidon naceu para o folk, fillo de músicos, publica o seu segundo álbum con Bedroom Community. All is well é un compendio de melodías traballadas que afondan nas raíces sen renunciar a outras fontes, non é casual que Sam Amidon estudase coa lenda do free-jazz Leroy Jenkins, en moitas das súas composicións adivínase un pulo experimental que acompaña á aparente simplicidade das súas propostas. Conxuga a súa carreira en solitario coa súa faceta de músico en bandas como Doveman ou Stars Like Fleas.

http://www.myspace.com/bedroomcommunity
http://www.bedroomcommunity.net

Javiera Mena

berio — 2009-10-21T15:42:17Z

JAVIERA MENA + Kings os Convenience

Centro Cultural Caixanova.
Martes, 3 de novembro.
21:00 h.
10-12-15 euros.

Dende Chile chega a novísima cantautora Javiera Mena, pop electrónico, casiopop fresco e directo para un debut marcado pola falta de complexos que amosa. Pop de autor para abrir a primeira sesión de Sinsal 7 Outono.

http://www.myspace.com/javieramenamusica

Kings of Convenience

berio — 2009-10-21T15:42:15Z

KINGS OF CONVENIENCE
+ Javiera Mena

Centro Cultural Caixanova.
Martes, 3 de novembro.
21:00 h.
10-12-15 euros.

Kings of Convenience volven á estrada e ás tendas despois de cinco anos de silencio. O dúo noruegués formado por Erlend Oye e Eirik Glambek Boe segue a transitar polas augas mansas dun pop a dúas voces delicado e sutil. Con Declaration of Dependence, o seu novo disco, Kings of Convenience ispen o seu son até superar ás súas anteriores aventuras no que a sinxeleza se refire, emocionais e sinceiros continúan cunha procura que en anteriores traballos xa deu os seus froitos. Que unha proposta como a súa estea entre os cincuenta discos máis vendidos dos circuítos indies do Reino Unido e Estados Unidos, tan saturados de hypes e new big things, está alén de ser unha sorpresa, é a confirmación dun traballo dirixido a pequenas audiencias que atopa ao gran público no boca a orella. Falar de Kings of Convenience sen destacar as influencias non é posible, moito se ten falado do seu parecido con Simon and Garfunkel, as voces, as melodías, as guitarras, pero non se poden entender sen situalos a medio camino entre a sensibilidade de Nick Drake e o pop naïf e divertido de Belle and Sebastian. A súa colaboración con Leslie Feist, a voz e a cara de Feist, axuda a encadralos dentro do pop contemporáneo. O silencio é o novo ruído, título do seu primeiro álbum, define á perfección o camiño deste dúo que unha vez máis trae do Norte unha proposta cálida e sinxela, para quentar a modo.

http://www.myspace.com/kingsofconvenience
http://www.kingsofconvenience.com